खाद्यसंस्कृती - स्पेशल गुळपोळी

नमस्कार 


आज आपण बघुया मकरसंक्रांती स्पेशल गुळपोळी

साहित्य:
★सारण : १/२ किलो गूळ
१ वाटी बेसन
२ सुक्या नारळाच्या वाट्या
३/४ वाटी तिळ
१/२ वाटी शेंगदाणे
१/२ वाटी खसखस
१/२ वाटी तेल
★आवरण :
१ १/२ वाटी मैदा
३/४ वाटी कणिक
२ चमचे तेल
२ चमचे बेसन
मीठ

कृती:
१) सुक्या नारळाच्या वाट्या किसून घ्याव्यात. सोनेरी रंग येईस्तोवर कोरडेच भाजावे. हाताने चुरून घ्यावे. हा चुरा आपल्याला १/२ ते ३/४ कप हवा आहे. कमी असल्यास अजून थोडं खोबरं भाजून चुरा करावा.
२) तिळ व खसखस स्वतंत्र, कोरडेच भाजून घ्यावे. बारीक पूड करून घ्यावी
३) शेंगदाणे भाजून त्याची साले काढून टाकावीत आणि एकदम बारीक कूट करून घ्यावा.
४) एका मध्यम पण जाड बुडाच्या पातेल्यात १/२वाटी तेल गरम करावे. त्यात १ वाटी बेसन खमंग भाजून घ्यावे.
५) गूळ बारीक किसणीवर किसून घ्यावा. सर्व भाजलेले जिन्नस (तिळ, खसखस, शेंगदाणे, बेसन, सुकं खोबरं) गूळामध्ये घालून मळून घ्यावे आणि घट्ट गोळा करावा.
६) मैदा, कणिक, मिठ आणि बेसन एकत्र करावे. २ चमचे तेल कडकडीत गरम करून पिठात घालावे. पाणी घालून मध्यमसर घट्ट गोळा भिजवावा. लागल्यास थोडे साधं तेल घालावे. १५ मिनीटे झाकून ठेवणे.
७) सारणाचे सारख्या आकाराचे गोळे करून घ्यावे.
८) आवरणासाठी आपल्याला "१ सारण गोळ्याला २ पिठाचे गोळे" हवे आहेत त्यानुसार सारणाच्या गोळ्यापेक्षा जरा लहान असा पिठाचा गोळा करावा.
९) २ पिठाच्या लाटयांमध्ये १ सारणाचा गोळा भरून लाटीच्या कडा सिल करून बंद करावा. हाताने हलके प्रेस करून थोड्या कोरड्या पिठावर पोळी लाटावी. गुळाची पोळी एका बाजूनेच लाटावी, बाजू पलटू नये.
१०) मिडीयम हाय हिटवर तवा तापवून दोन्ही बाजू खरपूस भाजून घ्याव्यात. कागदावर काढून किंचीत गार होवू द्याव्यात. एकदम गरम खावू नये, सारणातील गूळ गरम असल्याने चटका बसू शकतो. गुळपोळी गार किंवा कोमट दोन्हीप्रकारे छान लागते. गुळपोळीवर नेहमी थोडे तूप घालून खावे म्हणजे उष्ण पडत नाही.

टीप:-
पिठांचे प्रमाण आवडीनुसार बदलू शकतो. जर तुम्हाला खुडखुडीत पोळी हवी असेल तर मैदा जास्त आणि कणिककमी वापरावी तसेच गरम तेलाचे मोहनही घालावे. जर थोडी नरम पोळी हवी असेल तर फक्त गव्हाचे पिठ वापरावे आणि थंड तेलाचेच मोहन घालावे.

 

मायरा वैभव जगताप
https://www.aapalimayra.blogspot.com/

खाद्यसंस्कृती - भोगीची भाजी

नमस्कार 



 तुम्हा सगळ्यांना भोगीच्या खूप खूप शुभेच्छा
आज खूप दिवसांनी मी ही पोस्ट करत आहे
आज आपण बघणार आहोत संक्रांत स्पेशल रेसिपी
भोगीची भाजी

साहित्य:
१ मोठा बटाटा, सोलून मध्यम फोडी (साधारण १ ते दिड वाटी)
१ मध्यम वांगे किंवा ३ ते ४ भरायची लहान वांगी
१ वाटी गाजराचे मध्यम तुकडे
१/२ वाटी ओले चणे
१/४ वाटी भिजवलेले शेंगदाणे
१/४ वाटी पावट्याचे दाणे
५-६ तुकडे शेवगा शेंगेचे
★फोडणीसाठी -
२ चमचे तेल
१/२ चमचा मोहोरी
१/२ चमचा हिंग
१/४ चमचा हळद
१/२ चमचा लाल तिखट
१/४ चमचे जिरे
३-४ कढीपत्ताची पाने
२ चमचे भाजलेले तिळाचा कूट
२ चमचे मसाला
२ चमचे चिंचेचा दाट कोळ
१ - १ १/२ चमचा किसलेला गूळ
१/४ वाटी ओलं खोबरं
मीठ

कृती:
१) पातेल्यात तेल गरम करून मोहोरी, जिरे, हिंग, हळद, लाल तिखट, आणि कढीपत्ता घालून फोडणी करावी. प्रथम बटाटा, ओले चणे, पावटे, शेवग्याच्या शेंगा आणि शेंगदाणे घालून २ वाफा काढाव्यात.
२) नंतर वांगं आणि गाजर घालून मिक्स करावे. थोडे पाणी घालून पातेल्यावर झाकण ठेवावे. मध्यम आचेवर शिजू द्यावे.
३) भाज्या शिजत आल्या कि चिंचेचा कोळ आणि मसाला घालावा तसेच लागल्यास थोडे पाणी घालावे.
४) भाज्या शिजल्या कि गूळ, तिळाचा कूट, खोबरं घालावे. लागल्यास चव पाहून मिठ घालावे. एक उकळी काढावी.

टीप:
१) शेवग्याच्या शेंगा कोवळ्या घ्याव्यात नाहीतर त्या आतपर्यंत शिजत नाहीत. जर शेंगा जुन असतील तर त्या आधी थोड्या वाफवून घ्याव्या.
२) भाजी शिजायला थोडा वेळ लागतो. जर झटपट भाजी हवी असेल तर चणे, पावटे, शेंगा, शेंगदाणे कूकरमध्ये २ शिट्ट्या करून वाफवून घ्यावे. 

मायरा वैभव जगताप
https://www.aapalimayra.blogspot.com/

खाद्यसंस्कृती - बिस्कीट केक

नमस्कार 


 आज आपण बघुया बिस्कीट केक

साहित्य:-
४ पॅकेट्स पार्लेजी बिस्कीट
१ चमचा बेकिंग पावडर
१/२ चमचा सोडा
१ ते १/२ कप दूध,
२ चमचे कोको पावडर
१ चमचा व्हेनिला इसेन्स
बदामाचे तुकडे
कृती:-
१)बिस्कीट मिक्सर मधून फिरवून बारीक पावडर करून घ्यायची,नंतर त्यात दूध वगळता सगळे पदार्थ टाकून मिश्रण नीट मिक्स करून घ्यावे
२)गरजेनुसार थोडे थोडे दूध टाकून घेऊन केक चे मिश्रण तयार करून घ्यावे.
३)त्यात इसेन्स टाकून परत एकदा मिश्रण नीट मिक्स करून घ्यावे.नंतर कुकर च्या डब्याला तेल लावूनयात खाली थोडे बदामाचे तुकडे घालून मिश्रण त्यात टाकून डबा २ ते ३ वेळा नीट टॅप करून घ्यावा.
४) कूकर मध्ये तळाला मीठ टाकून त्यावर केक चे मिश्रण टाकलेला डबा ठेऊन २५ ते ३० मिन. बेक करून घ्यावा.
 

मायरा वैभव जगताप
https://www.aapalimayra.blogspot.com/

खाद्यसंस्कृती - चोकॉलटे मॅजिक बॉल

नमस्कार 


आज १ जानेवारी २०१८
सगळ्या खवय्याना माझ्या कडून नवीन वर्षाच्या शुभेच्छा
आज आपण झटपट बनणारी चॉकोलेट ची रेसिपी बनवूया
आज आपण बघुया चोकॉलटे मॅजिक बॉल

साहित्य:-
केक
२-३ चमचे डेसिकेटेड कोकोनट
२-३चमचे बदामाचे तुकडे
१चमचा जॅम
मेलटेड चोकॉलटे
पेपर कप

कृती:-
१)एका बाऊल मध्ये केक चे तुकडे घेऊन ते चुरा करा त्यात डेसिकेटेड कोकोनट ,बदामाचे तुकडे ,जॅम घालुन सगळे मिक्स करून घ्या आणि त्याचे छोटे छोटे बॉल्स करून घ्या
२) एका डिश मध्ये पेपर कप ठेवा
३) केक चे बॉल्स मेलटेड चोकॉलेट डीप करून एक एक बॉल पेपर कप मध्ये काढून घ्या
१०-१५ मिनिटे फ्रीज मध्ये ठेवा.




मायरा वैभव जगताप
https://www.aapalimayra.blogspot.com/

खाद्यसंस्कृती - चिकन फ्राय

नमस्कार,


आज आपण बनवूया चिकन फ्राय

साहीत्य:-
२ मोठे चिकनचे तुकडे (बोनलेस)
४ मध्यम आकाराचे बटाटे (उकडून)
१ मोठा चमचा आले- लसून – हिरवी मिरची पेस्ट
२ मोठे चमचे कोथंबीर चिरून
१ मोठा चमचा सोया सॉस
मीठ चवीनुसार
२ ब्रेडचे स्लाइस (मिक्सर मधून काढून)
१ अंडे (फेटून)
४ टोस्टची पावडर
तेल तळण्यासाठी

कृती:-
१) प्रथम चिकनचे तुकडे धुऊन घ्या. एका भांड्यात चिकनचे तुकडे बुडेल इतके पाणी व चिकन टाकून ५-७ मिनिट मंद आचेवर शीजुद्या (पाणी आटले पाहिजे)
२) त्यामध्ये सोया सॉस टाकून २ मिनिट शीजुद्या. थंड झाल्यावर त्याचे लांबट आकाराचे तुकडे करा.
३)उकडलेले बटाटे सोलून कीसून त्यामध्ये आले-लसून-मिरची पेस्ट, मीठ, कोथंबीर, ब्रेडक्रम व चिकनचे तुकडे घालून एक सारखे करून घ्या व त्याचे मध्यम आकाराचे चपटे गोळे करून ठेवा.
४)तेल तापवून घ्या. अंडे फेटून घ्या व चिकनचे गोळे एक एक करून फेटलेल्या अंडया मध्ये बुडवून मग टोस्टच्या पावडर मध्ये घोळून मग गुलाबी रंगावर तळून घ्या.

 
मायरा वैभव जगताप
https://www.aapalimayra.blogspot.com/

खाद्यसंस्कृती - पाव भाजी

नमस्कार 

आज आपण बघुया सगळ्यांची आवडती पाव भाजी

साहित्य:-
२ ते ३ मध्यम आकाराचे बटाटे
१ वाटी।फ्लॉवरचे तुरे
१ छोटे गाजर तुकडे
१ भोपळी मिरची बारीक चरलेली
३-४ फरजबी तुकडे मध्यम
१/४ वाटी मटार
१ १/२ टोमॅटो बारीक चिरून
१/२ कोथिंबीर कोथिंबीर
१/२ चमचा हळद
१ १/४ चमचा लाल तिखट
५-६ पाकळ्या लसूण बारीक चिरलेला किंवा २चमचे लसूण पेस्ट
२ मोठे कांदे बारीक चिरलेले
२ ते ३ चमचे एवहरेस्ट पावभाजी मसाला
मीठ चवीप्रमाणे
बटर/ तेल
लादी पाव किंवा स्लाइस ब्रेड

कृती: १
१)कांदा,मटार आणि टोमॅटो सोडून इतर सगळ्या भाज्या १ कप पाणी घालून कुकरमध्ये उकडून घ्या.कुकर थंड झाल्यावर उकडलेल्या भाज्या मॅश करून घ्या.
२) पातेल्यात २ चमचे बटर गरम करा त्यात लसूण घाला. खमंग वास सुटला कि बारीक चिरलेला कांदा २ ते ३ मिनिटे परतून घ्या. मग हळद,तिखट, १ टीस्पून पावभाजी मसाला आणि टोमॅटो घालून तेल सुटेपर्यंत परता.
३)मॅश केलेल्या भाज्या घालून परता.मटार घाला. मीठ आणि पाव भाजी मसाला घालून मिक्स करा. झाकण ठेवून वाफ आणा. आंबटपणा कमी वाटला तर किंचित आमचूर घाला किंवा लिंबू पिळा.
४)पाव बटर लावून भाजून घ्या.गरम भाजी, पावा बरोबर आणि कांद्या बरोबर सर्व्ह करा.

कृती:- २
ही अगदी झटपट पावभाजी बनवण्याची कृती आहे
१) सिमला मिरची सोडून सगळ्या भाज्या कूकर मधून उकडवून घ्या
कुकर थंडझाला की भाजी मॅश करून घ्या
२) एका कढईत २चमचे तेल घालून त्यावर लसूण पेस्ट घालून परतून घ्या त्यावर सिमला मिरची घालून परतून घ्या सिमला मिरचीचा रंग बदलला की त्यात लालतिखट,हळद आणि पावभाजी मसाला घालून तेल सुटेपर्यंत परता
३) मॅश केलेल्या भाजीत हे मसाला मिश्रण घालून एकजीव करावे चवी पुरते मीठ, बटर आणि कोथिंबीर घालावी
१-२ उकळी आलीकी गॅस बंद करावा
आपली झटपट पावभाजी तयार

टिप:-
१) झटपट पाव भाजी मध्ये आपला थोडा वेळ वाचतो करण त्या साठी सिमला मिरची आणि पाव भाजीसोबत दिला जाणारा कांदा हा बारीक चिरावा लागतो
बाकी भाज्यांचे मोठे तुडके चालतात
 

मायरा वैभव जगताप
https://www.aapalimayra.blogspot.com/

खाद्यसंस्कृती - पनीर पसंदा

नमस्कार 

आज आपण बघुया पनीर पसंदा

साहित्य:-
१/२ किलो पनीर तुकडे
१ वाटी काजू भिजवून
सिमला मिरची एक उभी कापून
फ्लॉवर एक वाटी उभा कापून
१ टोमॅटो बारीक चिरलेला
पुदिना बारीक कापलेला दोन चमचे
४ मिरी ठेचून
४ लवंग ठेचून
१ दालचिनी बारीक ठेचून
वाटण ;-
१ कांदा ,काजू ,आला- लसून पेस्ट, पुदिना याचं वाटणं
अमूल बटर दोन चमचे
गरम मसाला पावडर एक चमचा
एक वाटी मलई
एक कप दूध ,
एक चमचा मीठ,
साखर एक चमचा

कृती :-
१) निर्लेप कढईत पनीरचे तुकडे तेलात तळून घ्या व बाजूला काढा
२)कढईत दोन चमचे अमूल बटर टाकून ,
सिमला मिरची बारीक चिरलेला टोमॅटो ,आणि फ्लावर तळून घ्या
३)एक चमचा मीठ टाका ,एक चमचा साखर टाका
त्यात वाटण टाकून व गरम मसाला पावडर टाकून तळून घ्या
एक कप मलई ,एक कप दूध टाकून ढवळा
४)एक उकळी आल्यावर त्यात पनीरचे तळलेले तुकडे टाका
१० मिनिट मंद आचेवर शिजून द्या .

टीप:-
१) आपल्या आवडीनुसार आपण फरसबी ,गाजर पण घालू शकतो 


मायरा वैभव जगताप
https://www.aapalimayra.blogspot.com/

खाद्यसंस्कृती - चिकन तंदुरी

नमस्कार 


 आज मी तुम्हाला एक चिकन ची खास रेसिपी सांगणार आहे की जिचं नाव जरी काढलं तरी तोंडाला पाणी सूटं
चला तर आज आपण बघुया चिकन तंदुरी

साहित्य:
४०० ग्रॅम चिकन विथ बोन्स
२ चमचे आलं-लसूण पेस्ट
२ ते ३ चमचे घट्ट दही
२ चमचे तंदूर मसाला
१ १/२ चमचा लाल तिखट (बेडगी)
१/२ चमचा धनेपूड
१/२ चमचा जिरेपूड
१/२ चमचा हळद
२ चमचा लिंबू रस
लाल फूड कलर (Optional )
मीठ चवीप्रमाणे
१ चमचा तेल
२ चमचा बटर
१ चमचा चाट मसाला वरून घालण्यासाठी
सॅलडसाठी-
१ कांदा, उभा चिरलेला
१ वाटी कोबी उभा आणि पात्तळ चिरलेला
सॅलडला लावण्यासाठी तिखट,मीठ,लिंबू

कृती:
१)दही गाळण्यात घालून ५-१० मिनिटे एखाद्या बाउलवर ठेवा. म्हणजे जास्तीचं पाणी गळून घट्ट दही मिळेल.
२)मॅरीनेट करण्याचा मसाला बनवण्यासाठी घट्ट दह्यात , आलं-लसूण पेस्ट, तंदूर मसाला,लाल तिखट, हळद, धने-जिरेपूड,मीठ, १ चमचा तेल आणि लिंबू रस घाला. चमच्याने चांगलले फेटून घ्या.
३) चिकनच्या थाय आणि लेग्जना सगळ्या बाजुनी सुरीने चीर द्या. उरलेल्या चिकनचे ३" चे तुकडे करा सगळ्या चिकनला तयार केलेला मसाला लावून ७-८ तास मॅरीनेट करून फ्रीज मध्ये ठेवा.
४)ओव्हन ४०० F तापमानाला प्रीहीट करा. बेकिंग ट्रेला बटरचा हात लावून घ्या आणि त्यावर चिकनचे पिसेस अरेंज करा. प्रीहीटेड ओव्हनमध्ये चिकन ३० मिनिटे बेक करा. १५ मिनिटांनी चिकन उलटं करून वरून किंचित बटर सोडा आणि उरलेली १५ मिनिटे बेक करा.
५)तंदुरी भाजायची एक घरगुती पद्धत म्हणजे तंदूरभट्टी जर ती नसेल तर चार किलो डालडाचा डबा घ्या . त्या डब्याचा वरचा व खालचा गोलाकार भाग काढून टाकल्यावर डबा पोकळ राहिल .
६)तो डबा गैसवर ठेवावा . व त्यावरून कोंबडी लावलेली शिग ठेवावी म्हणजे चिकन सगळीकडून भाजून निघेल . परोठा व नान भाजायचा असल्यास हीच घरगुती भट्टी उपयोगी पडेल .
५)गरम तंदुरी चिकनवर लिंबुरस आणि चाट मसाला भुरभुरा बरोबर कांदा आणि कोबीचं सॅलड सर्व्ह करा.

टीप:
१) चिकन थाय आणि लेग्जना चीर दिल्यावर मॅरीनेट करण्याचा मसाला आत पर्यंत जाईल याची काळजी घ्या.
२) चिकन जास्ती वेळ बेक केल्यास चिवट होण्याची शक्यता असते.
३)चिकनला जर तुम्हाला स्मोकी फ्लेवर द्यायचा असेल तर एक सोपी टीप,
कोळश्याचा छोटा तुकडा चिमट्यात पकडून गॅसच्या फ्लेमवर किंवा मेणबत्तीवर लाल होईपर्यंत गरम करा. एका वाटीत हा तुकडा घालून तंदुरी चिकनच्या प्लेटमध्ये मधोमध ठेवा. कोळश्याच्या तुकड्यावर चमचाभर तूप घाला म्हणजे धूर यायला लागेल लगेचच वरून एखादं पातेलं ठेवून बंद करा. ५-७ मिनिटे तसंच झाकून ठेवा म्हणजे चिकनला कोळश्याचा मस्त फ्लेवर येईल  

 

मायरा वैभव जगताप
https://www.aapalimayra.blogspot.com/

खाद्यसंस्कृती - क्रीम बिस्कीट ब्लास्ट

नमस्कार 


आज आपण बघुया क्रीम बिस्कीट ब्लास्ट

साहित्य:-
५ कोणतीही चोकॉलटे बिस्किटे(मी बौर्बोन ची बिस्कीट घेतली)
१ चमचा इन्स्टंट कॉफी
१/४ कप कोमट पाणी
१ कप थंड दूध
२चमचे साखर
विप क्रीम
चॉकलेट वर्मसील/ चोकॉलेट चिप्स
१ चॉकलेट बिस्कीट चा जाडसर चुरा

कृती :-
१)एका बाऊल मध्ये बिस्किटे तोडून ठेवावी
२) दुसऱ्या एका बाऊल मध्ये १ चमचा कॉफी घ्या त्यात १/४ कप कोमट पाणी घालून त्या पाण्यात बिस्किटे विरघळवून घ्यावी
३) हे मिश्रण आणि १कप थंड दूध , साखर मिक्सर मध्ये किंवा ब्लेंडेर ने २-३ मिनिटे फिरवून घ्यावे
४) एका ग्लास मध्ये काढून घ्यावे ग्लास पूर्ण भरू नये त्यावर थोडे विप क्रीम घालावे परत बिस्कीट चा जाडा चुरा आणि परत विप क्रीम ने सजवावे वरून चोकॉलेट वर्मसील घालवे

टीप:-
१) कोणत्याही क्रीम बिस्कीट चे बनऊ शकतो पण चोकॉलेट फ्लेवर जास्त छान लागतो 
 

मायरा वैभव जगताप
https://www.aapalimayra.blogspot.com/

खाद्यसंस्कृती - बनाना कप केक

नमस्कार 


आज आपण बघुया बनाना कप केक

साहित्य:-
१२० ग्रॅम मैदा
पाव चमचा बेकिंग सोडा
१/२ चमचा बेकिंग पावडर
४५ ग्रॅम रिफाइंड तेल
१२० ग्रॅम कॅस्टर शुगर
पाव चमचा दालचिनी पूड
२कुस्करलेली केळी
सजावटी साठी:-
२००ग्रॅम डार्क चॉकलेट
१०० ग्रॅम फ्रेश क्रीम

कृती:-
१) मैदा, बेकिंग पावडर आणि सोडा एकत्र चाळून घ्यावे
२) तेल ,कॅस्टर शुगर,दालचिनी पावडर,कुस्करलेले केळ २-३ मिनिटं ब्लेंडेर ने फेटून घ्या त्यात मैदा चे मिश्रण घालून एकत्र करा
३)कप केक च्या साच्यात लायनर्स लावून त्यामध्ये हे मिश्रण अर्ध्या पेक्षा जास्त भरा
४) १८०℃वर प्री हीट ओव्हन मध्ये १०-१२ मिनिटे बेक करा
केक बेक झाला की थोडा वेळ थंड होऊ द्या
५) एका भांड्यात डार्क चोकॉलटे चे तुकडे करून घ्या. एका जडबुडाच्या भांड्यात मंद आचेवर क्रीम उकळी येई पर्यंत गरम करा.चोकॉलटे च्या तुकड्यावर गरम क्रीम घालून वर्ण २-३ मिनिटं झाकण लावून ठेवा
६) सगळे मिश्रण एकत्र करून अर्धा तास फ्रीज मध्ये ठेवा
७) मिश्रण गार झाले की आयसिंग बॅग मध्ये भरून केक वर डिझाईन करा.




मायरा वैभव जगताप
https://www.aapalimayra.blogspot.com/

खाद्यसंस्कृती - ओरिओ बिस्कीट केक

नमस्कार 


आज आपण बनवुया ओरिओ बिस्कीट केक

साहित्य :-
२० ओरिओ बिस्कीट
४चमचे पिठी साखर
पाव लिटर दूध
२चिमटी बेकिंग पावडर
२चमचे मैदा
तेल / बटर
सजावटी साठी:-
२ कप विप क्रीम
५-६ ओरिओ बिस्कीट चा जाडसर चुरा किंवा १/२ वाटी चॉकोलेट फ्लेक्स

कृती:-
१) ओरिओ बिस्कीटे मिक्सर मधून बारीक करून घ्यावीत
२) ४चमचे पिठी साखर घालून परत एकदा मिक्सर मधून फिरून घ्यावीत
३)एका बाऊल मध्ये बारीक केलेले मिश्रण काढून घ्यावी त्यात हळू हळू दूध मिक्स करावे त्यात २चिमटी बेकिंग पावडर घालून सगळे मिश्रण एकजीव करावे
४) केक टिनला प्रथम तेल किंवा बटर लावावे आणि नंतर मैदा लावून ठेवावा
५) सगळे मिश्रण केक तीन मध्ये काढावे अतिरिक्त हवेचे बुडबुडे जाण्याकरिता केक टिन ओट्यावर २-३ वेळा हलकेच ठोकावे
६) ओव्हन ५मिनिटे प्री हिट करावा
१८०℃ वर १५ मिनिटे केक बेक करा
७) एका नोझल बॅग मध्ये नोझल घालून बॅग खालून कापा म्हणजे क्रीम ची डिझाईन बाहेर पडेल
आपल्या आवडीनुसार केक डिझाईन करा
चॉकलेट आणि ओरिओ बिस्कीट ने सजवा 



मायरा वैभव जगताप
https://www.aapalimayra.blogspot.com/

खाद्यसंस्कृती - कुकर केक

नमस्कार 


आज आपण बघुया प्रेशर कुकर केक

साहित्य:
३/४ कप मैदा
२५० ते ३०० ग्रॅम कंडेन्स मिल्क (१/२ ते ३/४ कप )
१/४ कप बटर (मीठविरहित)
१/२ टिस्पून बेकिंग पावडर
१/२ टिस्पून बेकिंग सोडा
१/२ टिस्पून वनिला इसेंस
१/२ कप प्यायचा सोडा (सोडा वॉटर)
२-३ कप मीठ

कृती:
१) प्रेशर कूकरमधील रींग आणि शिट्टी काढून ठेवावी. कुकरच्या बुडाशी मीठाचा थर लावावा आणि प्रेशर कूकर झाकण लावून मोठ्या आचेवर गरम करण्यास ठेवावा. साधारण ८ ते १० मिनीटे गरम करावा. कूकरमध्ये पाणी घालू नये.
२) नंतर मैदा, बेकिंग सोडा, आणि बेकिंग पावडर एकत्र करून चाळून घ्यावे. जर बेकिंग पावडरचे लहान गोळे असतील तर ते मोडून घ्यावे. केकटीनला आतून बटरचे कोटींग करावे.
३) एका खोलगट मध्यम बाऊलमध्ये मऊ झालेले बटर आणि कंडेन्स मिल्क एकत्र करावे. हॅंड मिक्सरने व्यवस्थित फेटून घ्यावे. बॅटर एकजिव झाले कि त्यात एकूण मैद्यापैकी १/२ भाग मैदा आणि १/२ भाग सोडा वॉटर घालून हॅंड मिक्सरने फेटून घ्यावे. पिठाच्या गुठळ्या राहू देवू नयेत.
४) नंतर उरलेला मैदा आणि सोडा वॉटर, तसेच वनिला इसेंस घालून परत फेटावे. अजून एक महत्त्वाची गोष्ट म्हणजे उगाचच मिश्रण फेटत राहू नये. गरजेपुरतेच बॅटर एकदम स्मूथ होईस्तोवर फेटावे. खुप जास्त फेटल्याने केक मध्यभागी सिंक होतो.
५) तयार बॅटर केक टीनमध्ये ओतावे. अतिरीक्त हवेचे बुडबूडे निघून जाण्यासाठी, केक टीन ओट्यावर हलकेच ठोकावा (३-४ वेळा). कूकरची आच मध्यम करावी. गरम कूकरचे झाकण उघडून त्यात पकडीच्या सहाय्याने केकटीन ठेवावा. झाकण लावावे आणि ३५ ते ४० मिनीटे केक बेक करावा. २५ मिनीटे होईस्तोवर कूकर अजिबात उघडू नये. बेकिग करताना मधेमधे झाकण उघडल्यास कूकरच्या आतील तापमान कमी होते व पदार्थ हवा तसा बेक होत नाही.
६) साधारण २५ मिनीटांनी कूकरचे झाकण उघडावे. आता केक फुललेला दिसेल पण आतून शिजला नसावा. तरीही मध्यभागी टूथपिकने टोचून पाहावे, जर ओलसर बॅटर लागले असेल तर अजून १०-१२ मिनीटे केक बेक होवू द्यावा.
७) १०-१२ मिनीटांनी टूथेपिकने मध्यभागी टोचून पाहावे. जर टूथपिकला ओलसर बॅटर लागले नसेल आणि टूथपिक क्लिन बाहेर आली तर केक बेक झाला असे समजावे. केकटीन पकडीच्या सहाय्याने बाहेर काढावा.
५ मिनीटांनी डब्याच्या बाहेर काढून जाळीवर काढून ठेवावा. गार झाला कि सुरीने कापून सर्व्ह करावा.

टीपा:
१) कंडेन्स मिल्क आवडीनुसार वाढवावे. वरील प्रमाणात बेताचा गोड होतो. काहीजणांना कमीगोड लागू शकतो, म्हणून बॅटर तयार झाले कि त्याची चव पाहावी, लागल्यास थोडे कंडेन्स मिल्क वाढवावे.
२) कूकरची रींग आणि शिट्टी काढायला विसरू नये. तसेच कूकरमध्ये पाणी घालू नये.
३) केकटीन जाड हिंडालियमचा असावा. पातळ मेटल घेऊ नये. उष्णतेमुळे भांड्याला तडा जाऊ शकते.
४) जर दोन कलरमध्ये केक बनवयाचा असेल तर केक बॅटरचे २ भाग करावे. एक भाग तसाच ठेवावा, दुसर्‍या भागात २ ते ३ टेस्पून डार्क कोको पावडर आणि थोडे कंडेन्स मिक्स घालावे. आधी पांढरा तसाच ठेवलेला भाग केकटीनमध्ये ओतावा. त्यावर कोको घातलेले बॅटर घालावे.आणि बेक करावे.
५) केकटीन कूकरमध्ये निट राहतो आहे कि नाही ते आधी तपासून पाहावे. नाहीतर कूकर लहान असल्यास काही करता येणार नाही.
६) केकचे बॅटर केकटीनमध्ये अर्ध्यापेक्षा किंचीत जास्त भरावे. भांडे पूर्ण भरू नये त्यामुळे केक फुलल्यावर भांड्याच्या बाहेर येतो.
 

मायरा वैभव जगताप
https://www.aapalimayra.blogspot.com/

खाद्यसंस्कृती - प्लम केक

नमस्कार


 ख्रिसमस आता जवळ येतो चला यार आपण बघुया प्लम केक कसा बनवायचा ते

सामग्री-
१ १/२ कप प्‍लम स्‍लाइस
१कप मैदा
३अंडी फेटलेली
१/२ कप बटर
१/२ कप बारीक साखर
१ चमचा लेमन जेस्‍ट
१/२ चमचा व्हेनिला इसेन्स
१ चिमटी बेकिंग पाउडर
कृती:-
१) ओवन 325 डिग्री वर प्रीहीट करून घ्या.
२) केक पॅनला बटर लावून ग्रीस करून घ्या
३) एका भांड्यात साखर आणि बटर मिक्स करून घ्या.एका वेगळ्या भांड्यात अंडी आणि लेमन जेस्ट मिक्सकरून घ्यावे आणि नंतर साखर आणि बटर वाल्या मिश्रणात परत मिक्स करावे .
४)बटर वाल्या मिश्रणात मैदा , व्हेनिला इसेन्स आणि बेकिंग पावडर घालून चांगले मिक्स करावे
५) तयार मिश्रणाला केकच्या भांड्यात काढून घ्यावे त्यावर प्लम स्लाइस लावा
६) ४५ मिनिट साठी ओव्हन मध्ये बेक करत ठेवा .

टीप:-
१)केक साठी सगळे साहित्य हे आपल्या रूम टेम्प्रेचर प्रमाणे वापरावे . फ्रिज मध्ये जरी समान असेल तरी त्याचा गार पणा गेल्यावर वापरावे .
२) काजू आणि बदाम चे काप पण वापरू शकतात .


मायरा वैभव जगताप
https://www.aapalimayra.blogspot.com/

खाद्यसंस्कृती - बन पुरी किंवा केळ्याची पुरी

नमस्कार 


 बरेच वेळा केळी जास्त असतील तर खराब होतात किंवा त्याचा काय करायचं प्रश्न पडतो आज अशीच एक वेगळी रेसिपी बघुया बन पुरी किंवा केळ्याची पुरी

साहित्य :-
४ वाटी गव्हाचं पीठ
२-३ पिकलेली केळी
१/२ वाटी साखर किंवा गुळ
चिमूटभर सोडा
कणभर मीठ
तेल पाणी

कृती:-
१) एका भांड्यात गव्हाचं पीठ,साखर,सोडा,मीठ घ्यावे त्यात केळी कुस्करून घ्यावीत
२) लागेल तेवढं पाणी घेऊन सगळं पीठ मळून घ्यावे थोडं तेल लावावे
३) हे पीठ साधारण ८ -१० तास बाजूला ठेऊन द्यावे
साधारण सकाळी करायचे असेल आदल्या दिवशी रात्री मळून ठेवावे
४) ८-१० तासांनी पीठा चे छोटे गोळे करून (जरा जाडसर ठेवावे )त्याच्या पुऱ्या लाटाव्यात आणि तळाव्यात
आपली बन पुरी तयार

टीप:-
१) मी इथे गव्हाचं पीठ वापरलं ह्या पुऱ्यांसाठी मैदा वापरला तरी चालतो
२) गोडा चे प्रमाण आपल्यावर आहे कमी जास्त गोड हवे असेल त्या प्रमाणे साखर किंवा गुळ वापरणे
३) केळी जास्त पिकलेली असतील तरी चालतील 



मायरा वैभव जगताप
https://www.aapalimayra.blogspot.com/

खाद्यसंस्कृती - मटण पाय सूप

नमस्कार 


 आज आपण बघुया मटण पाय सूप

साहित्य:-
बोकडाच्या पायाचे साफ केलेले तुकडे १५-२० (धुवून)
२ मध्यम आकाराचे कांदे चिरलेले
१ लसुणाचा कांदा सोलून ठेचून.
पाव चमचा हिंग
१ चमचा हळद
८-१० काळी मिरी
५-६ दालचीनीचे छोटे तुकडे
३-४ तमालपत्र
२ मोठे चमचे तेल/ तूप
गरजेनुसार पाणी
मीठ

कृती:-
१) पाय स्वच्छ धुवून घ्या
२) कुकरमध्ये तेल /तूप चांगले गरम करून त्यावर वरील गरम मसाले व लसुण टाकुन फोडणी द्या.
३) त्यावर कांदा घालून गुलाबी रंगावर शिजवा. शिजलेल्या कांद्यावर हिंग, हळद व जर तिखट हवे असेल तर तिखट किंवा मिरची कोथिंबीर पेस्ट टाका. (मी टाकलेली नाही लहान मुलांना प्यायचे असल्याने.)
४)पायाचे तुकडे टाका, मीठ टाका. सर्व ढवळून त्यावर गरजेनुसार पाणी घाला.
५)कुकरचे झाकण बंद करुन पहिली शिट्टी आल्यावर गॅस मंद करुन साधारण पाऊण तास तरी शिजवत ठेवा.
६)पाया शिजायला वेळ लागतो. म्हणून टोपात न शिजवता सरळ कुकरमध्येच शिजवा. शिट्टी गेल्यावर गरमागरमच सर्व्ह करा.


मायरा वैभव जगताप
https://www.aapalimayra.blogspot.com/

खाद्यसंस्कृती - मेथी मुठिया

नमस्कार

साहित्य:
१/२ वाटी बारीक चिरलेली मेथीची पाने
१ ते दिड चमचा दही
दिड चमचा बेसन
दिड चमचा तांदूळ पिठ
दिड चमचा गव्हाचे पिठ
१ चमचा तेल
३-४ लसूण पाकळ्यांची पेस्ट
१ चमचा ओवा
१ चमचा तिळ
१ चमचा जिरे
मीठ
तळण्यासाठी तेल

कृती:
१) सर्व जिन्नस एकत्र करून मळावे. पाणी अजिबात घालू नये. जर खुपच कोरडे वाटले तर अजून थोडे दही घालावे.
२) एकत्र मळलेल्या या मिश्रणाचे १ इंचाचे लांबुडके गोळे करावे. तळण्यासाठी तेल गरम करावे आणि मंद आचेवर तळून घ्यावे.


मायरा वैभव जगताप
https://www.aapalimayra.blogspot.com/

खाद्यसंस्कृती - मेथी थेपले

नमस्कार 


बाजार मध्ये मेथीच्या जुड्या खूप प्रमाणात बघायला मिळतात चला तर आज आपण बघुया मेथीचे थेपले

साहित्य:
२वाटी कणिक
१/२ वाटी बेसन
१वाटी हिरवी मेथी ची बारीक चिरलेली पाने
थोडी कोथींबीर
१ चमचा लसुण हिरवी मिरची पेस्ट
१बारीक चिरलेला कांदा
१चमचा लाल मिरची पावडर
१/२ चमचा हळद
१/२चमचा जिरं
पाव चमचा हिंग
१चमचा धणे पावडर
१चमचा तीळ
१चमचा ओवा
१/२ वाटी दही
मीठ
तेल

कृती :
१)सगळे मिश्रण एकत्र करून पाण्याने भिजवुन घ्यावे .
२) १०-१५ मिनिटे झाकून ठेवावे
३) लहान पोळी प्रमाणे लाटुन घ्यावी आणि तेल लावून शेकून घ्यावी.
मेथीचे थेपले साखर घातलेल्या दह्या सोबत ,लोणच्या सोबत खाता येईल.


मायरा वैभव जगताप
https://www.aapalimayra.blogspot.com/

खाद्यसंस्कृती - कालव्याचे सुकं

नमस्कार 


आज आपण बघुया कालव्याचे सुकं

साहित्य:-
कालव १ ते दोन वाटे
१ मोठा कांदा बारीक चिरलेला
७-८ लसुण पाकळ्या ठेचुन
१/२ चमचा हळ्द
२ चमचे मालवणी मसाला
३-४ कोकम
१/२ वाटी कोथिंबीर बारीक चिरलेली
तेल
मीठ

कृती:
१)प्रथम कालव साफ करायची. कालवांमध्ये दगडी कच असतात ते कालव हातात घेतली की हाताला लागतात. ते काढायचे. कालव धुवायची
२) कढईत तेलावर लसणाची फोडणी देऊन त्यावर कांदा गुलाबी रंगावर तळावा. आता त्यावर हळद, मसाला घालून कालव घालावी वाफेवर थोडावेळ शिजु द्यावी. पाणी घालू नका कारण कालवांना पाणी सुटत. ५ ते ७ मिनीटांनी त्यात कोकम घाला व मिठ घाला. जरा परतुन कोथिंबीर घाला थोडावेळ वाफेवर ठेउन गॅस बंद करा.

टिपा:
१कालव समुद्राच्या खडपातील दगडाला चिकटलेल्या कवचीत असतात. कोयत्याने टोचून कवचीचे आवरण फोडून आतील कालव काढतात. त्यामुळे त्याला चिकटलेली कच राहते. म्हणून कालव व्यवस्थित साफ करावित. एकादा कच राहीला तर दाताखाली येतो.
२)कालव मोठ्या आकाराचीही येतात. ती कापुन घ्यावी लागतात.
 

मायरा वैभव जगताप
https://www.aapalimayra.blogspot.com/

खाद्यसंस्कृती - केळ्याचे शिकरण

नमस्कार 


लहान मुले फळे किंवा केळ खायला कंटाळा करतात. केळ्याचे शिकरण हे झटपट बनवता येते, मुलांना भूक लागलीतर लगेच चपाती बरोबर सर्व्ह करता येते. पिकलेले केळ हे चवीला मधुर, थंड, रुची उत्प्प्न करणारे आहे. दुध व केळे हे लहान मुलांचा पूर्ण आहार आहे. जी मुले अशक्त आहेत त्याच्या साठी केळ्याचे शिकरण हे उत्तम आहे.

साहित्य:
६ केळी (पिवळी पिकलेली)
१/२ लिटर दुध
१/४ चमचा वेलचीपूड किंवा व्हेनिला इसेन्स
१/४ वाटी साखर किंवा गोड हवे असेल तर अजून थोडी

कृती:
१)चांगली पिकलेली पिवळी केळी घेवून त्याची साले काढून त्याचे लहान-लहान तुकडे कापून घ्या.
२)एका मध्यम आकाराच्या भांडे घेवून त्यामध्ये चिरलेली केळी, दुध, साखर, व वेलचीपूड किंवा व्हेनिला इसेन्स घालून चांगले एकजीव करा.
केळ्या चे शिकरण तयार

टीप:-
१) तुम्हाला शिकरणा मध्ये अजून वेगळे बनवायचे असेल तर दुधा ऐवजी नारळाचे दुध, साखरे ऐवजी गुळ व वेलची पावडर सुद्धा घालून शिकरण छान होते.





मायरा वैभव जगताप
https://www.aapalimayra.blogspot.com/

खाद्यसंस्कृती - खेकडा मसाला किंवा चिंबोरी चे कालवण

नमस्कार


 
आज आपण बघुया खेकडा मसाला किंवा चिंबोरी चे कालवण

साहित्य:-
४-५ खेकडे/ चिंबोरी
आल लसुण पेस्ट १ चमचा
मिरची, कोथिंबीर पेस्ट १ चमचा
४-५ लसुण पाकळ्या ठेचुन
एक मोठा कांदा बारीक चिरलेला
२ चमचे मालवणी मसाला
१/२ चमचा हळद
मीठ
३-४कोकम
वाटण : १ कांदा व पाव वाटी सुके खोबरे किसुन भाजुन वाटावे
१ चमचा गरम मसाला.
थोडी कोथिंबिर
तेल

कृती:-
१)चिंबोरे साफ करुन घ्यावे. साफ करुन म्हणजे चिंबोरीचे दोन मोठे नांगे काढुन घ्यायचे, बाकीच्या नांग्यांचे वाटुन ते गाळून त्याचे पाणी घ्यायचे त्यामुळे रश्शाला दाटपणा येतो पण हे ऑप्शनल आहे. नंतर चिंबोरे मधुन कापुन त्यातील काळी पिशवी काढून टाकायची. जर चिंबोरे छोटे असतील तर आख्खे टाकले तरी चालतील.
२)एका पातेल्यात तेल टाकुन लसणाची फोडणी द्यायची. मग त्यावर कांदा गुलाबी रंगाचा होईपर्यंत तळावा. आता त्यात आल, लसुण पेस्ट टाकुन हळद, मालवणी मसाला, चिंबोरे, मोठे नांगे टाकुन चिंबोरे बुडतील एवढ पाणी घालावे.
३)आता १० मिनीटे उकळू द्याव मग त्यात गरम मसाला, कोकम, मीठ, कोथिंबीर टाकुन थोडा वेळ उकळवुन गॅस बंद करावा. चिंबोरे शिजण्यास थोडा वेळ लागतो म्हणुन मध्यम काचेवर १५ मिनीटेतरी शिजु द्यावे.

टिपा:
१)चिंबोर्‍यां मध्ये बरेच प्रकार आहेत. समुद्रातील चिंबोरे, शेतातील चिंबोरे, खाडितील खेकडे, डोंगरातील मुठे हे काळे कुळकुळीत असतात. समुद्रात तर बरेच प्रकारचे चिंबोरे मिळतात अगदी रंगित सुद्धा. ह्या चिंबोर्‍यांमध्ये कॅल्शियम भरपुर असत. हे गरमही असतात. काही जणांना अ‍ॅलर्जीहई असते चिंबोर्‍यांची. पण लहान मुलांना जेवणात चिंबोरे म्हणजे मेजवानीच. जर जेवणात चिंबोरा असेल तर १ तास तरी जेवणाला लागतोच. शिवाय ताटात हा पसारा होउन दोन हात खाण्यासाठी वापरावे लागतातच.
२)चिंबोर्‍यांचे अजुन सुप, सुके करता येते. तसेच पिठ भरुन कालवणही करतात.
चिंबोर्‍या घेताना कडक बघुन घ्यायच्या. जर चिंबोरे दाबल्यावर आत जात असतील तर ते पोकळ असतात. ३)भरलेल्या चिंबोर्‍यांमध्ये लाख (गाबोळी मिळते) ती मिळाली म्हणजे सोने पे सुहागाच
४)दिवाळीच्या आसपास खाडीत तसेच खाडीलगतच्या शेतात छोटी छोटी चिंबोरी मिळतात त्यांना पेंदुरल्या म्हणतात. ह्या पेंदुरल्या आतमध्ये पुर्ण लाखेने भरलेल्या असतात. लाख म्हणजे ह्यांची गाबोळी.


मायरा वैभव जगताप
https://www.aapalimayra.blogspot.com/